चेन्नई – तमिळनाडू राज्याचे मुख्यमंत्री विजय यांनी राज्यातील शेतकऱ्यांसाठी भात आणि ऊस या दोन पिकांच्या आधारभूत किमतीमध्ये मोठ्या प्रमाणात वाढ केली आहे .यासंदर्भात त्यांनी स्वतः होऊन विधानसभेमध्ये घोषणा केली आणि ही वाढ शेतकऱ्यांसाठी ऐतिहासिक असल्याचे म्हटले .
विधानसभेत स्वतःहून निवेदन करताना ते म्हणाले की, तमिळनाडूची आर्थिक स्थिती समाधानकारक नसली तरी, सरकारने भात आणि ऊस उत्पादक शेतकऱ्यांचे हित लक्षात घेऊन या दोन पिकांसाठी प्रोत्साहनपर रकमेत राज्याच्या इतिहासातील अभूतपूर्व वाढ करण्याचा निर्णय घेतला आहे.
त्यांनी सांगितले की, सप्टेंबरमध्ये भात खरेदी सुरू होईल आणि सरकार ‘फाईन’ (उत्तम दर्जाच्या) वाणांसाठी किमान आधारभूत किमतीव्यतिरिक्त (MSP) प्रति क्विंटल २८९ रुपये प्रोत्साहनपर रक्कम देईल. सामान्य वाणांसाठी ही प्रोत्साहनपर रक्कम प्रति क्विंटल १५९ रुपये असेल. या प्रोत्साहनपर रकमेसह, ‘फाईन’ वाणांसाठी एकूण किंमत प्रति क्विंटल २,७५० रुपये आणि सामान्य वाणांसाठी प्रति क्विंटल २,६०० रुपये होईल.
“इतिहासात पहिल्यांदाच, राज्य सरकारने एका वर्षात प्रोत्साहनपर किमतीत १५६ रुपयांची वाढ केली आहे,” असे श्री. विजय म्हणाले.
२०२५-२६ या वर्षासाठी साखर कारखान्यांकडे नोंदणी केलेल्या ऊस उत्पादक शेतकऱ्यांसाठी, मुख्यमंत्र्यांनी सांगितले की, केंद्र सरकारने निश्चित केलेल्या प्रति टन ३,२९०.५० रुपयांव्यतिरिक्त ७०९.५० रुपये प्रति टन इतकी विशेष प्रोत्साहनपर रक्कम दिली जाईल. या घोषणेमुळे ऊस उत्पादक शेतकऱ्यांसाठी एकूण किंमत प्रति टन ४,००० रुपये होईल.
“गेल्या पाच वर्षांत विशेष प्रोत्साहनपर रकमेत केवळ १५६ रुपयांची वाढ झाली होती, तर आता [आमच्या सरकारच्या] पहिल्याच वर्षात आधारभूत किमतीत ३६०.५० रुपयांची वाढ झाली आहे. पहिल्यांदाच उसासाठीची विशेष प्रोत्साहनपर रक्कम १३४ रुपयांच्या वर वाढवली जात आहे. आमचे सरकार शेतकऱ्यांना वाऱ्यावर सोडणार नाही. आम्ही कृषी क्षेत्र आणि ग्रामीण अर्थव्यवस्थेच्या पाठीशी खंबीरपणे उभे राहू,” असे ते म्हणाले.
विधानसभेचे अध्यक्ष जे.सी.डी. प्रभाकर यांनी स्पष्ट केले की, विधानसभेच्या नियम ११० अन्वये केलेल्या निवेदनावर कोणतीही चर्चा होणार नाही.
यापूर्वी, राजकीय पक्षांच्या सदस्यांना सरकारच्या घोषणांबद्दल सरकारचे “आभार मानण्याची” मुभा दिली जात असे.
