बुलेट ट्रेनसाठी होणार अवाढव्य खर्च
मुंबई – मुंबई – अहमदाबाद बुलेट ट्रेनसाठी जवळपास 2 लाख कोटी रुपये खर्च लागणार असून मार्च 2027 पर्यंत पूर्ण होणाऱ्या या प्रकल्पाच्या खर्चाची रक्कम महाराष्ट्रातील शेतकऱ्यांना कर्जमाफीसाठी लागणाऱ्या रकमेच्या आठपट ही रक्कम आहे .
रेल्वे मंत्रालयाच्या अंतर्गत असलेल्या रेल्वे बोर्डाचे अध्यक्ष आणि मुख्य कार्यकारी अधिकारी सतीश कुमार यांनी सांगितले की, मुंबई-अहमदाबाद हाय-स्पीड रेल प्रकल्पाचा खर्च जवळपास दुप्पट होऊन १.९८ लाख कोटी रुपये झाला आहे.’एनएचएसआरसीएल हाय-स्पीड प्रकल्पाबद्दल ते म्हणाले की दुसऱ्या सुधारित अंदाजाला अंतिम मंजुरी मिळणे बाकी असले तरी, अंदाजे हा खर्च सुमारे १.९८ लाख कोटी रुपये असेल,’ कुमार यांनी शुक्रवारी ‘प्रो-अॅक्टिव्ह गव्हर्नन्स अँड टाइमली इम्प्लिमेंटेशन’ अर्थात ‘प्रगती’ फ्रेमवर्कच्या ५० व्या बैठकीनिमित्त आयोजित पत्रकार परिषदेत हे सांगितले.
कुमार यांनी पुढे सांगितले की, ही रक्कम अजूनही सुधारणेच्या प्रक्रियेत आहे आणि मंत्रिमंडळाकडून त्याला ‘अंतिम मंजुरी’ मिळणे बाकी आहे. प्रकल्पाचा खर्च वाढला आहे का, या प्रश्नाच्या उत्तरात ते म्हणाले, “(याला) लवकरच, एक-दोन महिन्यांत मंजुरी मिळेल.”
मुंबई आणि अहमदाबादला जोडणाऱ्या नॅशनल हाय स्पीड रेल कॉर्पोरेशन लिमिटेड (NHSRCL) च्या बुलेट ट्रेन प्रकल्पाचा अंदाजित खर्च सुमारे १.०८ लाख कोटी रुपये होता, ज्यामध्ये जपान इंटरनॅशनल कोऑपरेशन एजन्सी (JICA) सुमारे ८८,००० कोटी रुपयांचे कमी व्याजदराचे कर्ज पुरवत आहे. असे समजते की, प्रकल्पाचा वाढीव खर्च भारत सरकार उचलेल आणि JICA अतिरिक्त निधी देणार नाही.
NHSRCL ही भारताच्या हाय-स्पीड रेल कॉरिडॉरला वित्तपुरवठा, बांधकाम, देखभाल आणि व्यवस्थापन करण्यासाठी २०१६ मध्ये स्थापन केलेली एक विशेष उद्देश कंपनी आहे. भारताच्या पहिल्याच असलेल्या या महत्त्वाकांक्षी बुलेट ट्रेन प्रकल्पाला भूसंपादन समस्या आणि कोरोना विषाणूच्या महामारीमुळे विलंब झाला आहे आणि तो सुरुवातीला २०२२ मध्ये कार्यान्वित होण्याची अपेक्षा होती. तथापि, आता संपूर्ण प्रकल्प २०२९ च्या अखेरीस पूर्ण होण्याची अपेक्षा आहे.
गुरुवारी, रेल्वे मंत्री अश्विनी वैष्णव यांनी सांगितले की, पहिली बुलेट ट्रेन १५ ऑगस्ट २०२७ रोजी सुरत-बिलिमोरा मार्गावर धावेल. संपूर्ण प्रकल्प टप्प्याटप्प्याने सुरू होईल, ज्यात सुरत-बिलिमोरा मार्गापाठोपाठ वापी-सुरत, वापी-अहमदाबाद आणि ठाणे-अहमदाबाद विभागांचा समावेश असेल. मुंबई-अहमदाबाद कॉरिडॉर अंतिम टप्प्यात कार्यान्वित होईल.५०८ किलोमीटर लांबीच्या या बुलेट ट्रेन प्रकल्पात १२ स्थानके असतील: मुंबई, ठाणे, विरार, बोईसर, वापी, बिलिमोरा, सुरत, भरूच, वडोदरा, आनंद, अहमदाबाद आणि साबरमती.
